Vriende is 'n mens se oorlewingspakkie in die ondermaanse. Dis goed om op vriendskaplike voet met vele mense te wees, maar daar is tog daardie spesiale hunkering na mense met wie jy eerlik, reguit en sommer net jouself kan wees.
My definisie van ware vriendskap was nog altyd: wanneer iemand alles van jou weet, en steeds jou vriend WIL wees. As jy slegs iemand se goeie kant ken, kan jy gewis nie daarop roem dat julle 'beste vriende' is nie, omdat daar geen waarborg is dat, wanneer jy daardie persoon se skadukant ken, jy nog dieselfde sal voel nie.
Almal van ons wil aanvaar word, liefde ken en deernis ervaar. Tog, wanneer hierdie dinge 'teenwoordig is', komende van mense of iemand wat jou nie heeltemal ken nie, is dit leeg en broos soos glas.
Die gemis aan naby vriende, of vriende met wie jy kontak verloor het (hoekom noem ons diegene nog 'vriende' ??) raak akkuut op 'n Sondag ...
Miskien is dit eerder die herinneringe aan goeie vriendskappe, wat 'n mens aan die gang hou - en wat die vitamine in die oorlewingspakkie is !
No comments:
Post a Comment