Grootouma

Vandag verjaar grootouma Anna Magrieta de Wet, gebore Krieg (*09/05/1867 +10/11/1944). Sy is agt jaar voor my geboorte oorlede, en haar man (Christiaan Rudolph) vier jaar voor ek die lewenslig vir die eerste keer aanskou het.

Gedurende my kinderdae is vele staaltjies oor die twee oumagrootjies vertel, die De Wet een, asook grootouma De Klerk. Ouma De Wet was, soos bo aangedui, 'n nooi Krieg - ook van Bethal se omgewing. Haar ma was 'n Rabie. Iets van grootouma wat my altyd gefassineer het, was die feit dat sy tydens die AB-oorlog, (met die kinders saam met haar) op kommando was . Sy was glo soos 'n man vermom, en die kinders is in grotte en skeure weggesteek. My oupa was toe 'n kannetjie van 10 jaar oud.

My pa het my by meer as een geleentheid vertel dat sy oupa Krisjan hom meegedeel het dat een van die swart meelopers van die Kakies, Ouma glo by geleentheid met 'n geweerkolf platgeslaan het. Dit het Oupa Krisjan en die ander 'burghers' so briesend gemaak, dat hulle die man 'gejag' het - en met hom afgereken het (op gepaste wyse - sal dit liewer nie hier herhaal nie).  

Vandag wemel die nageslag van Anna Magrietas, grootouma is geil vernoem! Stoere Boere, my vriend, stoere Boere!