jy nooi my
by jou ingangshek
verby
tot in jou tuin
wys my jou plante
wat geskakeerd en geil
in die boomryke skadu's
verdwyn
jy nooi my
na jou voorportaal
waar jy my saam met
ander genooides
gepas en gasvry
met oppervlakkige
woorde onthaal
jy nooi my
selfs na jou leefvertrek
waar ek
jou asem hoor
jou nabyheid ruik
en aanvoel hoe jou
teer teenwoordigheid
alles bedek
maar
net jou binnekamer
bly eksklusief en
privaat - jou allerheiligste plek
waar jy net
geselekteerdes
- sonder my -
toelaat
No comments:
Post a Comment